Qərbi Avropada fərdi kompüter satışı sürətlə azalır 2013-11-08 12:21:44 / CONFERENCES

“Gartner” analitik şirkəti müxtəlif ölkələrin kompüter bazarının vəziyyətini izləməkdə davam edərək növbəti tədqiqatını Qərbi Avropada aparıb.
Bu regionda 2013-cü ilin üçüncü rübünün yekunları üzrə fərdi kompüterlərin tədarük həcmi 11,9 milyon ədəd təşkil edib ki, bu da ötən ilin analoji dövrü ilə müqayisədə 12,8 faiz azdır.

Ötən rübdə Qərbi Avropanın kompüter bazarının bütün seqmentləri mənfi dinamika nümayiş etdirib. Belə ki, mobil sektorda tədarük həcmi ötən ilə nisbətən 14,5 faiz aşağı düşüb, habelə fərdi kompüterlərin buraxılışı 9,8 faiz azalıb. Korporativ ehtiyaclar üçün fərdi kompüterlərin tədarükü 8,3 faiz, istehlak seqmenti 17,1 faiz azalıb.

“HP” şirkəti Qərbi Avropada iri kompüter tədarükçü olaraq qalır. Üçüncü rübdə ABŞ istehsalçısı regiona 2,6 milyon (təxminən ötənilki həcmdə) fərdi kompüter tədarük edib. Aparıcı istehsalçılar arasında yer alan “Lenovo” şirkəti ötən rübü 16,3 faizlik artımla başa vuraraq 1,47 milyon ədəd (ötən il 1,27 milyon) texnika istehsal edib. Nəticədə Çin istehsalçısının bazar payı 9,3 faizdən 12,4 faizədək artıb.
“Acer” şirkətinin bazarda iştirak göstəricisinin 14,1 faizdən 11,7 faizədək azalması bu brendli kompüterlərin tədarükünün 18 faiz aşağı düşməsinə səbəb olub. Bu azalma istehsalçılar arasında ən böyüyü olub və şirkət 1,38 milyon buraxılmış kompüterlə kifayətlənib.
Sonrakı yeri kompüter istehsalı cəmi 1,1 faiz artan “Dell” tutsa da, rəqiblərinin uğursuzluğu nəticəsində şirkətin bazar payı 1,4 faiz bənd artaraq 10,3 faizə çatıb.  

Qərbi Avropa bazarında fəaliyyət göstərən nəhəng kompüter istehsalçıları beşliyində “Apple” şirkəti də yer alıb. Üçüncü rübdə bu istehsalçı 996 min fərdi kompüter tədarük edərək ötənilki göstəricidən 3 faiz geri qalıb. Bununla belə, “Apple”ın regiondakı payı 7,6 faizdən 8,4 faizədək artıb ki, bu da digər kompüter şirkətlərinin uğursuzluğu ilə əlaqədardır, - "DailyComm www.dailycomm.ru” yazır.  

    Copyright © AMEA İnformasiya Texnologiyaları İnstitutu, 2020