İnformasiya Texnologiyaları İnstitutunda Bakı Dövlət Universitetinin (BDU) müəllim və tələbə kollektivi ilə görüş keçirildi. Görüşdə BDU-nun Tətbiqi riyaziyyat və kibernetika, Mexanika-riyaziyyat fakültələrinin, eləcə də SABAH qruplarının informasiya texnologiyaları üzrə təhsil alan tələbələri iştirak edirdilər.
Öncə BDU-nun rektoru, fizika-riyaziyyat üzrə fəlsəfə doktoru, dosent Elçin Babayev institutun iş şəraiti, maddi-texniki bazası və burada həyata keçirilən innovativ layihələrlə yaxından tanış oldu. AMEA-nın vitse-prezidenti, institutun baş direktoru, akademik Rasim Əliquliyev institutda IV Sənaye İnqilabının və dünyanın qlobal çağırışlarını, ölkəmizin milli və strateji maraqlarını özündə ehtiva edən elmi tədqiqatların aparıldığını söylədi, eyni zamanda beynəlxalq aləmə inteqrasiya ilə bağlı həyata keçirilən tədbirlər haqqında ətraflı məlumat verdi.
Universitetin rektoru həmçinin institutun AzScienceNet Şəbəkə İdarəetmə Mərkəzinin fəaliyyəti ilə tanış oldu. Mərkəz rəhbəri, texnika üzrə fəlsəfə doktoru Babək Nəbiyev AzScienceNet ŞİM, DATA mərkəz və xidmətlər barədə məlumat verdi. Həmçinin, EaPConnect xidmətlərinin (eduroam, eduGAIN və s.) AzScienceNet üzərindən Bakı Dövlət Universitetində quraşdırılmasına dair müzakirələr aparıldı.
Sonra görüş institutun Böyük konfrans zalında davam etdi. Azərbaycanda elm və təhsilin inteqrasiyası istiqamətində həyata keçirilən tədbirlərin əhəmiyyətini qeyd edən akademik Rasim Əliquliyev ali məktəblərdə dünya elminin tələblərinə, müasir çağırışlara cavab verən ixtisaslar üzrə yeni kadrların hazırlanmasının vacibliyini vurğuladı. Elmin əsas missiyasının əldə olunmuş biliklərin paylanması, təhsilə ötürülməsi, eyni zamanda cənab Prezidentin həyata keçirdiyi siyasətə adekvat olan intellektual insan resurslarının yetişdirilməsindən ibarət olduğunu söylədi.
Sonra Bakı Dövlət Universitetinin rektoru Elçin Babayev çıxış edərək bildirdi ki, iki qurum arasında əməkdaşlıq əlaqələri daha da genişləndirilməli, universitetin müvafiq sahədə təhsil alan tələbələri institutun imkanlarından səmərəli istifadə etməlidir. Rektor nəzəri bilikərlə yanaşı, nüfuzlu elmi müəssisələrin intellektual potensialından və təcrübəsindən də istifadənin yüksəkixtisaslı kadr hazırlığına böyük töhfə verəcəyinə inamını ifadə etdi.
Daha sonra görüş interaktiv dialoq formatında davam etdi. Akademik Rasim Əliquliyev və rektor Elçin Babayev tələbələrlə müasir informasiya texnologiyaları, süni intellekt, kibertəhlükəsizlik və s. kimi aktual məsələlər ətrafında fikir mübadiləsi apardılar, onları maraqlandıran çoxsaylı sualları cavablandırdılar.
