2020-ci ildə kiberfırıldaqçılar mühəndislik, fişinq və DDoS hücumlarına üstünlük verəcəklər 2020-01-22 09:43:00 / MÜHÜM HADİSƏLƏR

Məlum olduğu kimi, bu gün İsveçrə Konfederasiyasında Dünya İqtisadi Forumunun illik toplantısı öz işinə başlayıb. Davosda keçirilən qeyri-rəsmi görüşlərdə aparılan müzakirələr zamanı Rusiya Federasiyası “Sberbank”ının idarə heyətinin sədr müavini Stanislav Kuznetsov bildirib ki, bu il kiberfırıldaqçılar əsasən üç istiqamət üzrə – mühəndislik, fişinq və DDoS tətbiqli kiberhücumlara üstünlük verəcəklər.

“Bu il DDoS kiberhücumlarının xarakteri dəyişəcək. Bu da öz növbəsində müxtəlif müəssisələr, əsasən də kiçik şirkətlər üçün daha böyük təhlükə yaradacaq. Bundan başqa, kiberfırıldaqçılar müxtəlif şirkətlərin əməliyyat sistemlərinə zərbə vurmaq məqsədilə yeni “zərərli” fişinq tətbiqlərindən istifadə edəcəklər. Bunların qarşısını almaq üçün biz kiberhücumları aşkar etməyi və zərərsizləşdirməyi bacarmalıyıq” – deyə S.Kuznetsov bildirib.

İdarə heyətinin sədr müavini “İTAR-TASS” xəbər agentliyinə müsahibəsində onu da vurğulayıb ki, kiberfırıldaqçılar sosial mühəndislik metodundan ötən ildən başlayaraq istifadə edirlər. Onun fikrincə, sosial mühəndislik istiqamətində qarşıya çıxan kiberhücumlarla mübarizə aparmaq çətin deyil. Hüquq mühafizə orqanları ilə birlikdə, bu cür cinayətlərə görə cəzaların sərtləşdirilməsi fonunda aparılan operativ işlər sayəsində yaxın bir neçə ay ərzində problemi kökündən həll etmək mümkündür.

    Copyright © AMEA İnformasiya Texnologiyaları İnstitutu, 2020