Ən kiçik “kamerofon” təqdim edilib 2020-02-12 09:41:00 / TEXNOLOJİ YENİLİKLƏR

“Zanco” şirkəti ən kiçik telefonun yeni versiyasını təqdim edib. Ölçüsü 1 sm artırılsa da, o, kamera və rəngli ekranla təchiz edilib.

hi-tech.mail.ru saytının məlumatına görə, şirkət 2017-ci ildə korpusunun hündürlüyü cəmi 4,67 sm təşkil edən “Tiny T1” adlı ən kiçik telefonunu təqdim etmişdi. Lakin qurğu birrəngli miniatür ekrana malik idi, zəng və ismarıcdan başqa heç bir funksiyanı yerinə yetirmirdi. Bu səbəbdən “Zanco”nun mütəxəssisləri ən kiçik telefonun təkmilləşdirilmiş versiyasını hazırlayıblar.

“Tiny T2”nin ölçüləri 6,1×3×1,65 sm, çəkisi isə cəmi 31 q təşkil edir. Bununla yanaşı, telefon rəngli ekran, kamera, radio, MP3/MP4 pleyer və əfsanəvi “Doodle Jump” daxil olmaqla, bir çox inteqrasiya edilmiş oyunlarla təchiz olunub.

Həmçinin telefonun avtonomluğu 2 dəfə artırılıb. O, bir dəfə enerji ilə doldurulduqdan sonra 7 günə qədər işləyir. Qurğudan kiçik pleyer kimi istifadə etmək və ona “Bluetooth” vasitəsilə simsiz qulaqlıqlar qoşmaq olar. 0,3 meqapiksellik kamera ilə foto və hətta video çəkmək mümkündür.

“Kickstarter” platformasında “Tiny T2” telefonunu cəmi 59 dollara sifariş etmək olar. Şirkət artıq istehsal üçün lazımi məbləği toplayıb. İlk alıcılar miniatür telefonları 2020-ci ilin aprel ayında əldə edə biləcəklər.

    Copyright © AMEA İnformasiya Texnologiyaları İnstitutu, 2020