Ümumdünya Telekommunikasiya Konfransı öz işini davam etdirir 2019-11-22 14:26:00 / KONFRANSLAR

Oktyabrın 28-də Misirin Şarm-əl-Şeyx şəhərində öz işinə başlayan Ümumdünya Telekommunikasiya Konfransı davam edir. Tədbirdə ölkəmizi Nəqliyyat, Rabitə və Yüksək Texnologiyalar Nazirliyinin, eləcə də nazirliyin Dövlət Radiotezliklər İdarəsinin nümayəndələri təmsil edirlər.

Konfrans zamanı Beynəlxalq Telekommunikasiya İttifaqının (BTİ) 193 üzv dövlətinin nümayəndələri telekommunikasiya sahəsi üzrə yeni texnologiyalar, o cümlədən 2020-ci ildən geniş tətbiqi nəzərdə tutulan “5G” texnologiyasına yeni tezlik diapazonlarının ayrılması, peyk tətbiqi üçün yeni və təkmilləşdirilən texnologiyaların istifadəsini dəstəkləyən tənzimləmə tədbirləri kimi bir sıra məsələləri müzakirə edir. Həmçinin müxtəlif sahələrdə tətbiq olunacaq innovativ radiotexnologiyalar üçün radiotezliklərin müəyyənləşdirilməsi və onların tətbiqi zamanı qarşılıqlı maneə təsirlərinin yaranmaması üçün ölkələr arasında koordinasiya şərtlərinin müəyyən edilməsi və digər aidiyyəti məsələlərə dair fikir mübadiləsi aparılır. Konfrans zamanı gələcək texnoloji transformasiya perspektivləri də müzakirə olunur.

Sonda işçi qrupları tərəfindən hazırlanmış sənədlər komitələrdə təsdiqlənərək plenar iclaslara təqdim olunur. Bu, gələcəkdə yeni radiorabitə sistemlərində tətbiq ediləcək radiotezliklərin qlobal harmonizasiyasına şərait yaradır.

Ümumdünya Telekommunikasiya Konfransı həftə sonu öz işini bitirəcək.

Qeyd edək ki, Ümumdünya Telekommunikasiya Konfransı 4 ildən bir keçirilən yüksək səviyyəli tədbirdir. Zərurət yarandığı hallarda BTİ-nin radiorabitə qaydalarına, radiotezlik spektrinin və peyk orbitlərinin istifadəsini tənzimləyən beynəlxalq müqaviləyə yenidən baxılması onun səlahiyyətlərinə daxildir.

Xatırladaq ki, Azərbaycan qurumun fəaliyyətində yaxından iştirak edir. Belə ki, ilk dəfə olaraq Azərbaycan Rabitə Administrasiyasının 3 nümayəndəsinin namizədliyi Beynəlxalq Telekommunikasiya İttifaqının Radiorabitə Bürosunun Tədqiqat qruplarında rəhbər vəzifələrə təsdiq edilib.

    Copyright © AMEA İnformasiya Texnologiyaları İnstitutu, 2017