Azərbaycan nümayəndə heyəti Fransa hökumətinin YUNESKO-nun baş qərargahında təşkil etdiyi İnternet İdarəçiliyi Forumunun (İİF) 13-cü illik yığıncağında iştirak edib.

AR Nəqliyyat, Rabitə və Yüksək Texnologiyalar Nazirliyinin İnformasiya cəmiyyətinin və elektron idarəçiliyin innovativ inkişafı şöbəsinin müdiri Rəşad Əzizovun rəhbərlik etdiyi nümayəndə heyətinə nazirliyin və BMT-nin İnkişaf Proqramının əməkdaşları daxil olub.

Tədbirdə müxtəlif ölkələrin  hökumət, biznes nümayəndələri, elm və vətəndaş cəmiyyətinin təmsilçiləri İnternetlə bağlı aktual problemləri müzakirə ediblər.

Forumun əsas məqsədi İnternet idarəçiliyinə dair bir sıra məsələlərin müzakirəsindən əldə edilən nəticələrlə bağlı ictimaiyyətə tövsiyələr verməkdən ibarətdir.

Fransa Respublikasının Prezidenti Emmanuel Makron və BMT-nin Baş katibi Antonio Quttereş İnternet İdarəçilik Forumunda açılış nitqi ilə çıxış  ediblər.

İclasda Nəqliyyat, Rabitə və Yüksək Texnologiyalar Nazirliyinin İnternet idarəçiliyi istiqamətində həyata keçirdiyi işlər və gələn il Azərbaycanda keçirilməsi nəzərdə tutulan “Gənclər üçün İnternet İdarəçiliyi Forumu” barədə məlumat verilib. Bildirilib ki, tədbirin keçirilməsində əsas məqsəd innovativ iqtisadiyyatın genişləndirilməsi və elektron iştirakda Azərbaycanın potensialının artırılmasıdır. Eyni zamanda, əsas hədəf Azərbaycanı regional İKT inkişaf mərkəzinə çevirmək, İKT sənayesinin yerli iştirakçılarının beynəlxalq mütəxəssislərlə birgə təcrübə mübadiləsi  və əməkdaşlıq imkanlarını genişləndirmək, regionların milli İnternet idarəçiliyi prosesinə cəlb edilməsidir.

Tədbirdə qeyd edilib ki, Azərbaycanda İKT-nin, o cümlədən İnternetin inkişafına xüsusi diqqət yetirilir. Belə ki, İnternet informasiya məkanı olmaqla yanaşı, həm də dövlət idarəçiliyi, təhsil, səhiyyə, biznes, bank işi və digər sahələri əhatə edən mühit rolunu oynayır. Eyni zamanda, bildirilib ki, Azərbaycanda İnternet bir qlobal şəbəkə kimi fikir və söz azadlığının təmin olunmasında, sosial şəbəkələrin genişlənməsində, vətəndaşların idarəçilik proseslərinə cəlb olunmasında yeni imkanlar qurur.