Dubayda tamamilə avtomatlaşdırılmış “ağıllı” polis bölməsi fəaliyyətə başlayıb.

mir24.tv saytının məlumatına görə, bu, dünyada ilk belə müəssisədir. Bölmənin ziyarətçiləri 60 növ xidmətdən istifadə etmək imkanı əldə edəcəklər. Həmçinin yol-nəqliyyat hadisəsi haqqında məlumat və ya hüquqların pozulması haqqında ərizə verə biləcəklər. Burada polislə ünsiyyət videoəlaqə vasitəsilə və elektron şəbəkə üzərindən həyata keçirilir. “Ağıllı” polis bölməsinin gündə 24 saat, həftədə 7 gün işləyəcəyi gözlənilir.

BƏƏ hakimiyyəti Dubayın bütün rayonlarında bu kimi müəssisələr yaratmaq niyyətindədir. Yerli hüquq-mühafizə orqanlarının əməkdaşları onların adi polis bölmələrini boşaltmağa kömək edəcəyinə əmindirlər.

Xatırladaq ki, iyun ayında Dubayın polis xidmətinə “O-R3” adlı patrul robomobilinin gətiriləcəyi məlum olub. Nəqliyyat vasitələri avtonom rejimdə şəhərin küçələri ilə hərəkət edərək insanları və avtomobilləri skan edəcəklər.