“Ağıllı” səsgücləndirici təhlükəli vəziyyətdə polis çağırıb 2017-07-12 12:00:00 / MARAQLI MƏLUMATLAR

ABŞ-da polis evdə quraşdırılmış “ağıllı” səs gücləndiricinin 911-ə zəng vurması ilə rəfiqəsini hədələyən şəxsi həbs edib. Tijeras (Nyu-Meksika ştatı) qəsəbəsində baş vermiş hadisə zamanı Eduardo Barros adında şəxs öz rəfiqəsinə fiziki güc tətbiq etməyə başlayıb və onu silahla hədələyib.

Polis (şerif) bölməsinin nümayəndələrinin sözlərinə görə, Barros rəfiqəsini öldürməklə hədələyən zaman soruşub: “Sən, şerifə zəng vurmusan?”. Güman olunur ki, evdə quraşdırılmış “ağıllı” səsgücləndirici həmin şəxsin sözlərini səs əmri kimi qəbul edərək 911-ə zəng vurub. Çağırışa cavab vermiş təcili xidmətin operatoru təhdidləri eşidib və polisi çağırıb.

hitech.newsru.com saytının məlumatına görə, “ağıllı” səsgücləndiricinin təsadüfi olaraq işə düşməsi ana və onun uşağının təhlükəli vəziyyətdən qurtulmasında əhəmiyyətli rol oynayıb.

Qeyd edək ki, ötən ilin dekabrında Arkanzas ştatının Bentonvill şəhərinin polisi 2015-ci ilin noyabrında baş vermiş qətlin araşdırılmasına kömək etmək üçün Amazon Echo “ağıllı” ev səsgücləndiricisinin “şahid olma” ehtimalını nəzərə alaraq “Amazon” şirkətinə müraciət edib.  Həmçinin şübhəli şəxslərin günahının sübutu kimi su və elektrik sayğacları daxil olmaqla digər “ağıllı” qurğuların da “ifadələri alınıb”.

    Copyright © AMEA İnformasiya Texnologiyaları İnstitutu, 2017